Боксын насанд хүрэгчдийн улсын аварга шалгаруулах тэмцээн СТО-д үргэлжилж байна. 32 байгууллагын 140 тамирчин оролцож буй уг тэмцээн 3-9-ний хооронд үргэлжлэн явагдах юм. Энэ удаагийн УАШТ AIBA-гийн шинэ дүрмээр зохион явагдах ба эрэгтэй 8, эмэгтэй 5 жинд өрсөлдөж байна.
Шинэ дүрмийн дагуу эрэгтэй доод болон дунд жингүүд ширүүн өрсөлдөөнтэй болохоор болсон бөгөөд 49 кг, 52 кг-ын тамирчид нэг жинд тулалдана. Мөн 60 кг байхгүй болсон учраас тус жингийн шилдгүүд жин өгсчээ. Тухайлбал Азийн наадмын аварга Э.Цэндбаатар өгссөн бол 64 кг-д өрсөлддөг дэд аварга Б.Чинзориг нар нэг жинд өрсөлдөхөөр болсон байна. Эмэгтэй боксчдоос ДАШТ-ий хүрэл медальт М.Нандинцэцэг УАШТ-ийг өнжихөөр болжээ. Ихэнх тамирчид олимпод орох мөн шигшээ багт багтах хүсэлтэй байгаа учир жингээ зөв сонгож, ширүүн өрсөлдөөн үзүүлэхийн төлөө гал гарсан тулаануудыг хийж байна. Өчигдөр л гэхэд олон улсын хэмжээний мастер Г.Ган-Эрдэнэ эхний тойрогт учраа таарсан Ховдын залуу тамирчинд 3:2 харьцаагаар ялагджээ.