Канад улсын Ванкувер болон Викториа хотноо шайбтай хоккейн өсвөр үеийн дэлхийн аварга шалгаруулах 43 дахь удаагийн тэмцээн он дамнан явагдаж байна. ДАШТ-д оролцож буй 10 улсын баг хоёр хэсэгт хуваагдан хүч үзсэн ба шөвгийн дөрвөн баг тунан улдээд байна.
Хоккейн спортоор дэлхийн хүчтэй багуудын нэг болох Чехийн шигшээ баг шөвгийн 8-ийн тоглолтонд АНУ-ын шигшээ багтай учраа таарч 3:1 харьцаагаар хожигдон тэмцээнээ өндөрлүүллээ.
Тоглолтын турш Америкийн баг Чехийн хаалганд 41 удаа цохилтыг гүйцэтгэсэн бол Чехийн баг Америкийн хаалганд 19 удаа цохисон байна. Хамгийн сүүлд 1997 онд Финландад болсон ДАШТ-ний шөвгийн 8-д Чехийн баг Америкийн багийг хожиж байсан түүхтэй. Ерөөс энэ хоёр баг түүхэндээ 6 удаа ДАШТ-ний шөвгийн 8-д учраа таарч Америкийн шигшээ баг таван удаад нь хожоод байгаа юм. Өмнөх ДАШТ-ний хүрэл медалийн төлөө мөн хоорондоо учраа таарахад Америкийн баг Чехийг 9:3 харьцаагаар хожиж хүрэл медаль хүртэж байсан билээ.
Ийнхүү Америкийн баг цааш хагас шигшээд шалгарч тав дахь удаагаа дэлхийн аварга болж чадахыг эсэхийг харах л үлдлээ.
Тэд 2004, 2010, 2013, 2017 оны дэлхийн аварга баг юм. Тэднийг хагас шигшээд ОХУ-ын хүчирхэг баг хүлээж байна. Тэд мөн л дэлхийн дөрвөн удаагийн аварга буюу 1999, 2002, 2003, 2011 оны аварга баг билээ.
О.ДАШ