Английн Ливерпүүл клуб болон Египетийн шигшээ багийн довтлогч Мухамед Салах 2018 оны Африк тивийн шилдэг хөлбөмбөгчин боллоо.
Өнөө жил 26 настай Салахтай хамт энэхүү шагналын сүүлийн шатанд Ливерпүүл клубийн Сенегал довтлогч Садио Мане, Арсеналын довтлогч Аубамеяанг нар шалгарч үлджээ.
Мухамед Сала 2017 онд энэхүү шагналын эзнээр тодорч байсан бөгөөд хоёр жил дараалан Африк тивийн шилдгээр нэрлэгдэж буй нь энэ юм.
Энэ талаар Мухамед Салах “Би хүүхэд байхаасаа энэ шагналыг хүртэхийг мөрөөддөг байлаа. Хичээл зүтгэл минь мөрөөдөлд минь хүргэлээ. Гайхалтай мэдрэмж төрж байна” гэж ярьжээ.
Мухамед Салах 2017-2018 оны улиралд нийтдээ Ливерпүүлийн төлөө 44 гоол оруулж аваргуудын лигийн шигшээд шалгарсан билээ. Мөн Африк тивээс Египетийн шигшээ багаа ОХУ-д зохиогдсон ДАШТ-нд хөтлөн шалгаруулж чадсан юм. Африкийн оны шилдэг бэлгэдлийн 11 тамирчны багийн ахлагчаар нэрлэгдсэн нь шилдгээр шалгарахад том нөлөө үзүүлжээ.
О.ДАШ
