Чөлөөт бөхийн эрэгтэйчүүдийн Дэлхийн Цомын тэмцээн гуравдугаар сарын 16-17-нд ОХУ-ын Якутск хотод болно. Тэмцээнд өнгөрсөн жил Унгарын нийслэл Будапештэд болсон ДАШТ-д эхний найман байрт орсон баг өрсөлдөх юм.
А хэсэгт зохион байгуулагч орон ОХУ, Япон, Куба, Туркийн шигшээ багтаж байгаа бол манай шигшээ баг “В” хэсэгт өнгөрсөн жилийн аварга АНУ, Дэлхийн цомын найман түрүүтэй Иран, Гүржийн багтай багтсан байна.
Монголын багийн эсрэг барилдах Гүржийн шигшээ баг энэ жилийн Европын аварга шалгаруулах тэмцээн болон Европын наадамд гол анхаарлаа хандуулж, Якутад дан залуу тамирчдаа илгээхээр болжээ.
Гүржийн багаас хамгийн туршлагатай бөх нь “Лондон-2012” олимпийн наадам, “Стамбул-2011” ДАШТ-ний хүрэл медальт, 2012, 2013 оны Европын аварга Дато Марсагашвили байгаа бөгөөд 92 кг-ын жинд зодоглоно. Манайхантай нэг хэсэгт хүч үзэх АНУ-ын шигшээ баг мөн дэлхийн цомд залуу тамирчдаа түлхүү оролцуулах мэдээ байна.
О.ДАШ
