“Токио-2020”-д уралдах Монголын хоёр дахь марафонч тодров.
Хонгконг улсад “Алтан зам” марафон гүйлтийн олон улсын тэмцээн болоход манай тамирчин Б.Мөнхзаяа зургадугаар байр эзлэв.
Энэ тэмцээнээс “Токио-2020” олимпийн наадамд оролцох норматив олгосноороо онцлог юм. Манай марафонч Б.Мөнхзаяа медалийн үзүүрээс атгаад алдсан ч олимпийн замд гүйх болзол хангалаа.
Үүнээс өмнө Г.Хишигсайхан Японд болсон “Сэншү марафон”-оос алтан медаль хүртснээр олимпийн наадмын норматив биелүүлээд байв. Олон улсын хөнгөн атлетикийн холбооноос олимпод өрсөлдөх тамирчдын нэрсийг албан ёсоор батламжлах юм.
О.ДАШ