Монгол Улсын Ерөнхийлөгчийн ивээл дор жил бүр уламжлал болгон зохион байгуулдаг 21 аймгийн аварга шалгаруулах 16 хүртэлх насныхны “Футзалын үндэсний цом”-д Я.Лхагва дасгалжуулагчтай Увс аймгийн баг түрүүллээ.
Дархан-Уул аймагт хоёрдугаар сарын 25-аас гуравдугаар сарын 04-ий хооронд болсон 16 хүртэлх насныхны “Футзалын үндэсний цом”-д 14 дөрвөн аймгийн өсвөрийн хөлбөмбөгчид гурван хэсэгт хуваагдан өрсөлдсөн юм. Хэсгийн тоглолтууд шигшээ тулаануудаас ялгарахгүй нэн сонирхолтой өрнөсөн бөгөөд “А” хэсгээс 1. Орхон, 2. Дархан-Уул, 3. Өмнөговь, “В” хэсгээс 1. Дорнод, 2. Говь-Алтай, 3.Баян-Өлгий, “С” хэсгээс 1. Говь-Сүмбэр, 2. Увс аймгийн багууд тус тус шөвгийн наймд шалгарсан.
Дээрх багуудаас Увс аймаг аваргын цомыг өргөж Говьсүмбэр аймаг мөнгөн медаль хүртлээ. Хүрэл медалийг талбайн эзэн Дархан-Уул аймгийн хөвгүүд хүртсэн бол баруун хязгаарын Баян-Өлгий аймгийн баг дөрөв дүгээр байранд орлоо. Увс аймгийн насанд хүрэгчдийн баг 2018 оны талбайн "Үндэсний цом"-д түрүүлээд байсан бол өсвөрийн баг нь ийнхүү "Футзалын үндэсний цом"-д аваргалаад байна.
Шигшээ багуудаа шагналт байранд шалгаруулсан шилдэг хөлбөмбөгчдийг тодруулахад “Шилдэг хаалгач”-аар Л.Болдбаатар /Увс/, “Шилдэг довтлогч”-оор 18 гоол А.Содмөнх /Дархан-Уул/, “Шилдэг тоглогч”-оор Е.Амарсанаа /Увс/ нар тус тус нэрлэгдээ.
