УАШТ-ний мөнгөн шагнал тун бага. Нэр хүнд нь өндөр. Тэгвэл теннисчидийн нэр хүндийг ч өсгөх, ахиухан шагнал олгох зорилгоор "Сэрээтэр cup" тэмцээн хоёр дахь жилдээ Монголын ширээний теннисний шилдэг 12 тамирчныг нэг дор дахин цуглууллаа.
Улсын дөрвөн удаагийн аварга Э.Лхагвасүрэн, улсын 3 удаагийн аварга Я.Бэгз, улсын хошой аварга Баярмагнай, Билэгт, улсын аварга З.Төрболд, спортын мастер Эрдэнэбаяр, Чинзориг, дэд мастер Билэгжаргал, Тэмүүлэн, Лхагва-Эрдэнэ, Мөнхзориг, Сэр-Од нарын рейтингээрээ тэргүүлж буй эрэгтэй теннисчид 4 хэсэгт хуваагдан ур чадвараа үзэж байна.
Хэсгээс Э.Лхагвасүрэн, Билэгт, Бэгз нарын аваргуудтай хамт спортын дэд мастер Тэмүүлэн хэсгээ тэргүүллээ.
Хэсгээ тэргүүлсэн тамирчид гоц мөргөж, хоёр гурваар гарсан теннисчидийн ялсантай нь хагас финалдана. Шалгарсан 8 тамирчин олимпийн хасагдах системээр аваргаа шалгаруулна.
Цомын эзэн 2 сая, финалдсан теннисчин 1,5 сая, хагас шигшээд үлдсэн нь тус бүр 500,000 төгрөгийн шагнал хүртэнэ. "Сэрээтэр cup" -ын анхны тэмцээнд улсын хошой аварга Билэгт түрүүлж, Баярмагнай үзүүрлэж, Лхагвасүрэн, Эрдэнэбаяр нар шөвгөрсөн.
Энэ жилийн хувьд Бэгз, Тэмүүлэн нарын бэлтгэл ханасан, тун иртэй байна гэж теннис сонирхогчид дүгнэж байна. Тэмцээний финалын тоглолт 15.00аас эхэлж 19.30 цагт өндөрлөнө гэж зохион байгуулагч Амгалан Control.mn сайтад мэдээллээ. Тэмцээн Монголын Үйлдвэрчний Эвлэлийн Төв Зөвлөлийн Баруун 4 зам дахь Спортын зааланд болж буй юм байна. Үзэгчдэд нээлттэй.
Э.ОТГОО
