Эрэмбээрээ Улсын АШТ-ний ард бичигддэг Лигийн нэг бүрчилсэн төрөлд Лхагвасүрэн түрүүлж, Эрдэнэбаяр үзүүрлэсэн бол шилдэг эрэгтэй 12 теннисчдийн бооцоот, хамгийн өндөр шагналтай тэмцээнд мөн л энэ хоёр шилдэг теннисчин финалдлаа. Бэгз, Баярмагнай, Билэгт, Төрболд нарын олон аваргууд, мөн Мөнхзориг, Тэмүүлэн, Билэгжаргал, Чинзориг, Сэр-Од нарын шилдэг залуу теннисчид Монгол улсын анхны улсын аварга Сэрээтэр агсны нэрэмжит " Сэрээтэр цом"-ын төлөө хоёр дахь жилдээ хүч үзсэн. Хагас шигшээд Лхагвасүрэн 3:2 -оор Мөнхзоригийг, Эрдэнэбаяр 3:1 -ээр Билэгжаргалыг буулгаж, аваргын төлөө тоглосон. Тоглолт маш өрсөлдөөнтэй өрнөж, тав дахь үед 11:9-ээр Эрдэнэбаяр хожсоноор энэ жилийн аваргын цомыг өргөлөө. Гуравдугаар байрт Мөнхзориг, Билэгжаргал нар орж тус бүр 500,000 төгрөгийн шагнал хүртлээ. Түрүүлсэн теннисчинг 2 сая, үзүүрлэсэн теннисчинг 1,5 сая төгрөгөөр Сэрээтэр агсны зээ хүү Бадрал тэргүүтэй үр хүүхэд нь байллаа. -Ирэх жилээс тэмцээний хүрээгээ тэлнэ. Өвөрмонгол болон Буриадын автономит улсаас теннисчдийг урьж оролцуулна гэж тус тэмцээнийг санаачлагч, зохион байгуулагчийн нэг Амгалан тэмцээний хаалтын хүлээн авалтын үеэр мэдээллээ.
Зүүн гараас: Улсын 4 удаагийн аварга Э.Лхагвасүрэн, спортын мастер Эрдэнэбаяр, дэд мастер Мѳнхзориг, Билэгжаргал нар шагналын тавцанд
