Хэсгийн 3 барилдаанаа дараалан ялан финалд үлдсэн дэлхийн аваргын мөнгөн медальт Э.Сумьяаг УАШТ-д түрүүлнэ гэдэгт хэн ч эргэлзээгүй. Түүний өрсөлдөгч нь Э.Сумьяагаас сулхан. Гэтэл финалын өмнө жинг хэмжихэд түүний жин 50 граммаар хэтэрсэн байлаа. Олон улсын бөхийн холбооны дүрмийн дагуу жин илүү гарсан тохиолдолд барилдаанаас хасах дүрмийн дагуу түүний финалд барилдах эрхийг хассан нь энэ удаагийн УАШТ-ий гол сенсаац боллоо. -Жин хэмжихэд зөвхөн өмсгөлтэйгээ л зогсдог. 50 грамм бол маш өчүүхэн зөрүү. Үсийг нь хусаад нэг үзэхгүй. Тэгвэл жиндээ орох ч байсан юм билүү. Сумьяа бол Казахстанд болох Чөлөөт бөхийн ДАШТ-ий гол найдлагын нэг байсан. Маш харамсалтай юм боллоо гэж гэж ахмад тамирчин Бүргэдээ халаглаж байв.
Жин нь илүү гарсан тамирчинг барилдуулах эрхгүй. Энэ бол олон улсын жишиг. Жингээ барих нь хувь тамирчны хариуцлага. Багш нь ч анхаарах ёстой байсан. Тамирчид жингээ хэмжүүлэхээс өмнө өөрсдийнхөө жинг хянах жин ажилладаг. Тун харамсалтай юм боллоо. Финалд барилдах тамирчин хасагдсанаар Э.Сумьяад ялагдаж, хүрлийн төлөө хүч үзэх байсан тамирчин алтан медалийн төлөө барилдлаа. Энэ бол Олон улсын чөлөөт бөхийн түүхэнд тохиолдож буй анхны тохиолдол. Э.Сумьяагаас 53 кг-ийн жингийн дэлхийн томчууд жийрхэж байсан. Маш сайхан боломжоо алдлаа. Харамсалтай байна. Маш том сургамж ч боллоо. Уул нь дэлхийн аваргаас ирэх зуны олимпын эрхийг халааслах зорилго өвөртөлж байсан. Гэхдээ үүнээс гадна бас гурвын зэрэг олимпын эрхийг авах тэмцээн цаана нь бий гэж МЧБХ-ны ерөнхий нарийн бичгийн дарга Батбаяр тодотголоо. Ийнхүү Монголын чөлөөт бөхчүүд Казахстанд болох ДАШТ-д дэлхийн аваргын мөнгөн медальт, 53 кг-ийн жинд түрүүлэх боломжтой байсан Э.Сумьяагүй мордох боллоо.
Ц.ЭНХБАТ