Дэлхийн гран при ангиллын тэмцээнд Монголоос төдийгүй Ази тивээс анх удаа Монголын баг тамирчид түрүүллээ.
Өнөөдөр буюу 10 дугаар сарын 6-ны өдөр сагсан бөмбөгийн 3х3 төрлийн энэ улирлын сүүлчийн гран при тэмцээн БНСУ-д болж аваргаа тодрууллаа. Тэмцээнд Монголоос “Улаанбаатар ММС Энержи” багийнхан өрсөлдсөн юм. Э.Цэрэнбаатар, Д.Дэлгэрням, Э.Дөлгөөн, Г.Цэнгүүнбаяр нараар багаа бүрдүүлсэн тэд аваргын төлөөх тоглолтод “Пиран” багийг 13:10-аар хожлоо.
Монголын баг тамирчид хагас шигшээд ОХУ-ын “Нева” багийг хожиж, тус тэмцээний шигшээд анх удаа шалгарсан юм. Тэд шөвгийн наймд Сербийн алдбарт “Земун” багийг 17:16-гаар хожсон билээ.
Ингэснээр “Токио-2020” олимпын эрх авах чухал оноо цуглууллаа. Тэмцээний MVP буюу үнэ цэнэтэй тоглогчоор Д.Дэлгэрням шалгарсан байна.
Э.Отгоо