Английн премьер лигийн 13 дугаар тойргийн хүрээнд "Манчестер Юнайтед" клуб "Шеффилд Юнайтед"-ын талбайд зочиллоо. Энэ тоглолтод хожвол "Улаан чөтгөрүүд" 5 дугаар байр руу орж ирэх боломжтой байлаа. Гэвч тэд эцсийн мөчид хоёр оноогоо алдсан юм.
Эсрэгээрээ "Шеффилд" 90 дэх минутад гоолдож, тэнцүүлснээр том багаас нэг оноо салгаж дөнгөлөө. 3:3-аар тэнцсэн энэхүү тоглолтын 19 дэх минутад Флек гоолдож, тооны харьцааг нээсэн. Улмаар Муссе 52 дахь минутад дахин нэгийг нэмж, "Шеффилд" тэргүүллээ баталгаажуулсан. Гэвч 72 дахь минутад Брэндон Уильямс тооны харьцааг ойртуулж, Гринвуд 77 дахь минутад тэнцүүлсэн. Ингээд зогсохгүй Рэшфорд 79 дэх минутад энэ улирлын 7 дахь гоолоо оруулж, багтаа тэргүүлэл авчирсан юм. Харамсалтай нь тэд тэргүүллээ хадгалж чадалгүй 90 дэх минутад Макберни гоолдож, хоёр баг тэнцлээ.
"Шеффилд" тэнцсэнээр 18 оноотой 6 дугаар байрт бичигдэж байгаа бол "Манчестер Юнайтед" 17 оноотой есдүгээр байрт үлдлээ.
Т.Хуншагай
