Чөлөөт бөхийн бага дэлхийн аварга гэгддэг “Алтан гран при” тэмцээн Красноярскт гурав дахь өдрөө үргэлжилж байна. И.Ярыгин агсны нэрэмжит, 31 дэх удаагийн тэмцээний эхний өдөр шигшээд шалгарсан Монголын хоёр бөх болох Баатаржавын Шоовдор, Цогт-Очирын Намуунцэцэг нар түрүүллээ. Эмэгтэйчүүдийн 59 кг-ын жинд барилдсан “Будапешт-2018”, “Нур-Султан-2019” ДАШТ-ий хүрэл, Азийн АШТ-ий мөнгө, хүрэл медальт, үндэсний шигшээ багийн тамирчин, ОУХМ Баатаржавын Шоовдор алтан медалийн төлөөх барилдаанд ОХУ-ын Хадижат Муртузалиеваг ялсан байна. Ингэснээр тус тэмцээнд таван жилийн дараа дахин түрүүлж, хошой аварга болсон байна. “Алтан гран при”-гийн дэвжээнд Төрийн дууллаа анх удаа эгшиглүүлсэн хүчтэн бол 23 хүртэлх насны ДАШТ-ий хүрэл, Азийн аварга, өсвөр үеийн ДАШТ-ий мөнгөн медальт, үндэсний шигшээ баг, “Хасу-Мегастарс” клубийн тамирчин, ОУХМ Цогт-Очирын Намуунцэцэг. Гавьяат дасгалжуулагч Ц.Баярсайханы шавь, 50 кг-ын жинд барилдсан тэрбээр шигшээд 23 хүртэлх насны ДАШТ-ий хошой хүрэл медальт ОХУ-ын Надежда Соколоваг 7:2-оор яллаа.
