Өмнөговь аймгийн Гурван тэс сумын чулууны ченж иргэд БНХАУ-ын чулууны ченж нартай нийлж, улаан хас чулууг маш өндөр үнээр газар дээр нь худалдан авч байгаагаас үүдэн 2020 оны нэгдүгээр сарын 15-наас хойш давхардсан тоогоор 4,000 гаруй хүн цуглан, улаан хас чулууны уурхай руу дайрч, хууль бусаар олборлолт явуулж байна. Эдгээр иргэдийг орон нутгийн ИТХ, Цагдаа, Онцгой байдлын газраас шаардлага хүргүүлж, газар дээр нь ирж тараасан ч иргэд буцаж ирж, хүч хүрэлцэхгүй байгаа талаар тус уурхайн тусгай зөвшөөрөл эзэмшигч “Баатарван транс”-ийн менежер мэдээлсэн байна.
Гурван тэс сумын Засаг дарга О.Баттогтох: “Уурхайн талбай руу иргэд олгоороо дайрч, олборлолт явуулж байгаа нь үнэн. Бид цагдаа, онцгой байдлынхантайгаа хамтраад ч хүч хүрэлцэхгүй байв. Харин өчигдөр Өмнөгөвь аймгийн Засаг дарга шийдвэр гаргаж, өнөөдрөөс 20 хүнтэй нэмэлт хүч ирж байна. Тэгэхээр асуудал шийдэгдчих байх. Манай аймгийн хувьд өндөржүүлсэн бэлэн байдалд ажиллаж байгаа”
Э.Сувдаа
