Тэд хасагдаж " дуусаж" байсан. Тоглолтын 90 ' дэх минут гарсан, шүүгч нэмэлт цаг сунгаж байв. Анх удаа шөвгийн наймд үлдсэн Италийн "Аталанта " баг тоглолтыг 1:0-ээр хошуучилсаар ... Цар тахлын улмаас хариу тоглолтыг цуцалсан учир энэ хэвээр тоглолт өндөрлөвөл, Неймар, Мбаппегийн ПСЖ Аваргуудын Лигээс хасагдах аюулд учирсан байсан. Гэтэл хөлбөмбөгийн бурхан тэнгэр аз ивээлээ хайрласан мэт 90, 93 дахь минутад 2 гоолиг дараалан оруулснаар тэд хожил байгуулсан.
Өвдөгний бэртлийн улмаас энэ тоглолтыг өнжсөн Мбаппед харахаас өөр багтаа туслах боломж байсангүй.
Дэлхийн хамгийн өндөр үнэтэй довтлогч Неймар маш гайхалтай тоглолт үзүүлсэн. Тэр хамгийн олон удаа бөмбөгөнд хүрсэн тоглогч байлаа. Тоглолтын шилдэг тоглогчийн шагналыг түүнд гардуулсан.
