Удахгүй Ерөнхийлөгч зарлиг гаргана. Түүгээр дорхи бөхчүүд цол ахиж чимэг нэмнэ. Тодруулбал: Нэг: Аварга Н.Батсуурьд өвдөг шороодсон; - Говь-Алтай аймгийн Тонхил сумын харьяат аймгийн арслан Б.Суманчулуунд улсын начин цол, - Увс аймгийн Тэс сумын харьяат, улсын начин хүртсэн Ц.Мөнхбаярт улсын харцага - Өмнөговь аймгийн Ханхонгор сумын харьяат улсын харцага Ц.Одбаярт улсын заан - Архангай аймгийн Цэнхэр сумын харьяат, улсын заан М.Бадарчид гарьд цол Хоёр: Улсын арслан Р.Пүрэвдагвад өвдөг шороодсон; - Баянхонгор аймгийн Гурванбулаг сумын харьяат улсын начин Б.Эрдэнэхүүд чимэг - Завхан аймгийн Баянтэс сумын харьяат улсын начин Ш.Пүрэвгарьд улсын харцага цол Гурав: Улсын харцага Б.Бат-Оршиход өвдөг шороодсон; - Хөвсгөл аймгийн Шинэ-Идэр сумын харьяат аймгийн арслан Ц.Сандагдоржид улсын начин, - Сэлэнгэ аймгийн Цагааннуур сумын харьяат улсын начин Б.Орхонбаярт улсын харцага цолыг тус тус олгох юм. Гэсэн ч энэ нь нөхөн олголт болж чадахгүй. Тухайлбал, улсын харцага Б.Бат-Орших энэ жилийн улсын их баяр наадмын түрүү бөхөд нэрлэгдэж байсан улсын харцага Д.Анарыг дөрвийн даваанд, улсын цолонд хүрнэ хэмээн олон жил яригдсан аймгийн арслан Ц.Сандагдоржийг тавын даваанд өндөр цолонд хүрэх боломжтой байсан залуухан улсын начин Б.Орхонбаярыг зургаагийн даваанд тус тус хаясан. Ийм олон сайхан бөхийг допинг хэрэглэсэн ганц л бөх хохироосон.