Английн Шеффилд хотын Крусибле театрт 4 дэх өдрөө үргэлжилж буй Снукер Бильярдын ДАШТ -ний эхний тойрогт Жак Лисовски 10:9 -ийн харьцаагаар Али Картерийг хожиж дараагийн шатанд шалгарлаа. 8:6-аар хожигдож явсан тэрбээр сүүлийн 5 өрөгт илүүрхсэнээр Дэлхийн АШТ-ний эхний хожлоо авлаа. Украйн гаралтай Англи иргэншилтэй Жак Лисовскийн дараагийн учраа нь Австралийн снукерчин, дэлхийн аварга Нэйл Робертсон аж.
Эхний тойрогт Картерийг 8:6-аас барьж хожлоо. Тухайн үед барих боломжгүй мэт санагдах үе байсан ч , түүнээс хожлыг нь булаан авч чадсандаа баяртай байна. Шилдэг 16-д шалгарч эхний даалгавраа биелүүллээ. Миний зорилго ДАШТ-д түрүүлэх. Дараагийн учраа маань дэлхийн аварга Робертсон. Энэ даваа хүндхэн сорилт болно гэдгийг мэдэрч байна. Яг өнөөдөр Робертсонтой таарахыг хүсэж буй снукерчин байхгүй. Гэхдээ би Робертсоныг давна. Зөвхөн түүнийг ч биш, бусдыг нь ч би ялах болно. ДАШТ-ний финалд найз Трамптай таарахыг чин сэтгэлээсээ хүсэж байна. Бид дотно найз нөхөд. Мэдээж тэр надад хожигдвол баярлахгүй. Гэхдээ л намайг түрүүлээсэй гэж чин сэтгэлээсээ хүсдэг сайн нөхөр минь мөн гэж Лисовски Ску спортод ярилцлага өгөв.
