“Токио-2020” зуны олимпийн наадмын бөхийн төрлүүдийн эрх олгох сүүлчийн буюу Дэлхийн тэмцээн Болгарын нийслэл Софи хотод үргэлжилж байна.
Чөлөөт бөхийн эрэгтэй 57 кг-ын жинд үндэсний шигшээ баг, Цагдаагийн Ерөнхий Газрын харьяа ХҮЧ спорт хороо, “Хангарьд” спорт клуб, “Алтай” констракшны тамирчин, Монгол Улсын гавьяат тамирчин Эрдэнэбатын Бэхбаяр мөнгөн медалийн болзол хангаж, Токиогийн олимпийн наадамд оролцох эрхээ халаасаллаа.
Тэгснээрээ Монголын чөлөөт бөхийн тамирчдын олимпийн наадмын найм дахь, эрэгтэй бөхчүүдийн гурав дахь эрхийг эх орондоо авчирлаа.
Бэхбаяр гавьяат хагас шигшээд Европ тивийн 3 удаагийн аварга, Азербайжаны гүрж гаралтай бөх Георгий Эдишерашвилиг 6:2-оор ялж мөнгөн медалийн болзол хангалаа. Бэхбаяр алтан медалийн төлөө Японы бөх Юки Такахашитай маргааш барилдана гэж дасгалжуулагч А.Цэдэнсодном Sportlife.mn-д тодруулга өглөө.
