Аваргуудын Лигийн финалд Манчестер Сити баг Челситэй тунаж үлдсэн. Тэд тавдугаар сарын 29-д Туркийн Стамбулд цомын төлөө цорын ганц тоглолт хийнэ.
Манчестер Сити анх удаагаа, харин Челси 2 дахь удаагаа финалдах гэж байна. Энэ бол ALL ENGLISH TEAM FINAL-ын гурав дахь тохиолдол юм.
Хамгийн сүүлд 2018-19 оны улиралд Ливерпуль-Тоттенхэм хоёр финалдаж Ливерпуль цом өргөж байснаас хойш дахин Английн хоёр баг Аваргуудын Лигт финалд дахин таарлаа.
-Миний хувьд Премьер Лигийн цом хамгийн үнэ цэнтэй. Гэхдээ Аваргуудын Лигийн цомыг өргөвөл бүр сайхан санагдаж байна. Учир нь, Манчестер Сити багт үгүйлэгдэж буй цом.
Багийн эзэд ч, тоглогчид ч, фанатууд ч энэ цомыг биднээс хүлээж буй. Тэгэхээр энэ улирлын хамгийн том даалгавар бол Аваргуудын Лигийн цом гэж Пеп Гвардиолла хэлсэн. Гэхдээ тэд Челсиг хожиж байж энэ цомыг өргөх учиртай. Гэтэл сүүлийн нэг сарын хугацаанд Челси багт тэд дараалан хожигдсон.
Хамгийн сүүлд энэ амралтын өдрүүдэд , Английн Премьер Лигийн 35 дахь тойргийн тоглолтонд 2:1-ээр хожигдол амслаа. Энэ нь сэтгэл зүйн хувьд хүндхэн тусах магадлалтай гэж мэргэжилтнүүд дүгнэж байна.
