Европын Супер Лигийг орхи. УЕФА-г эсэргүүцэхээ зогсоо. Буруугаа ухамсарлаж, алдаагаа хүлээсэн АС Милан, Интер Милан багуудтай нэгд. Үгүй бол Италийн "Серия-А" Үндэсний Дээд Лигээс хөөнө гэдэг сануулгыг Италийн Хөлбөмбөгийн Холбооны ерөнхийлөгч Габриель Гравин "Ювентус " багийн удирдлагад хүргүүлсэн байна.
2021 оны дөрөвдүгээр сарын 19-нд Английн топ-6, Италийн 3, Испанийн 3 баг нийлж Европын Супер Лиг байгуулснаа зарласан боловч, УЕФА-гийн хүчтэй эсэргүүцэлтэй тулгарч, 9 баг нь ухраад байгаа билээ. Үлдсэн 3 баг болох Испанийн Реал Мадрид, Барселона, Италийн Ювентус багийн Аваргуудын Лигт оролцох эрхийг нь хоёр жилээр хасах шийдвэрийг УЕФА гаргасан. Тэгвэл Супер Лигийг бүрмөсөн орхихгүй бол Серия-А Лигээс ч хөөгдөх аюул Ювентус багийг нөмөрлөө.
-УЕФА болон Европын Үндэсний Лигүүдийг сарниулах, зуу зуун жилийн түүхэн уламжлалыг тасалдуулах, үйл ажиллагааг нь давхардуулах, фанатуудыг нь хуваахыг хэзээ ч зөвшөөрч болохгүй. Ийм үйлдлийг өөгшүүлж огт болохгүй. Тиймээс хамгийн хатуу арга хэмжээг Үндэсний Лиг, Холбоодууд, фанатуудтай нь хамтран авах болно.
Европын Супер Лигээс ухарсан 9 багт 15 сая ам.долларын мөнгөн торгууль оногдуулсан. Мөн Европын цомын тэмцээнээс олох орлогоос 5 хувийн шимтгэл суутгана.
Харин Европын Супер Лиг байгуулах санаанаасаа ухралгүй үлдсэн Реал Мадрид, Барселона, Ювентус багуудад ямар ч орон зай үлдээхгүйн төлөө бүхнийг хийнэ гэж УЕФА-гийн ерөнхийлөгч А.Сеферин байр сууриа хатуу илэрхийлсэн. Ийнхүү алдарт Роналдо, Месси нарын баг ирэх улирлаас Аваргуудын Лигт оролцох эрхээ хасууллаа.
Э.ОТГОНЖАРГАЛ