Нэр алдар нь хөлбөмбөгийн ертөнцөд гэрлийн хурдаар өсөж, амжилтаараа Роналдо, Месси нарыг ардаа орхисон гэрэлтэж буй Норвеги од Эрлинг Хааландыг Европ тив булаацалдаж буй.
Тэр Дортмундад хүчин зүтгэсэн анхны улиралдаа Германы цомын аваргын цомыг өргөснөөр " үнэ ханшаа" улам нэмэгдүүлж чадлаа. Германы цомын аваргын финалын тоглолтонд Лейпциг багийг 4:1-ээр буулган авахад Эрлинг Хааланд 2 гоол оруулж багтаа тус нэмэр болсон байна. Гоолын салхийг хагалсан Эрлинг Хааланд дахин нэг гоолыг оруулснаар хожлыг улам баталгаажуулсан.
Дортмундын оруулсан 4 гоолын дамжуулалтанд багийн ахлагч Ройс оролцсон байна. Дортмунд баг хамгийн сүүлд, 2012 онд Цомын аваргын цомыг өргөлөө байжээ.
-Энэ улиралд бид үл ялиг азгүйтсэн. Ганц цом өргөлөө. Ирэх улиралд цомоо ядаж хослуулна гэж багийн ахлагч Ройс ирэх улирлын зорилгоо тодорхойллоо.
Э.ЛХАГВА
