Аз жаргалын дээдийг мэдэрч байна. Дүрсэлж хэлэхийн ч арга алга. Энэ цомыг хүүхэд ахуй цагаасаа л мөрөөдсөн. Мөрөөдлөө Лэйстэр Сити багтайгаа биелүүлэх учиртай байж. Юрий Телеманс ямар гайхалтай гоолыг айлын хаалганд шигтгэв ээ!!!
25 метрийн зайнаас, Челсигийн хаалганы баруун дээд өнцөгт "буудсан" тэр гоолыг бид дахин дахин үзэх болно гэж багийн ахлагч , хаалгач Шмихель Ску спортод сэтгэгдлээсээ хуваалцлаа.
Бид тактикийн тоглолт хийсэн. Жимми Вардигийн үндсэн байршлыг сольсон. Багийнхан бүгд сайн тоглолоо. Бельги тоглогч Телемансын гайхалтай гоолын ачаар Лэйстэр Сити баг хүсэн хүлээсэн Английн Холбооны цомыг түүхэндээ анх удаагаа өргөлөө.
Жилийн дараа, үзэгчидтэй тоглож, Челси багийг 1:0-ээр буулган авч 23000 фанатынхаа хамт баяраа тэмдэглэж, цомоо өргөлөө гэж багийн дасгалжуулагч Рожерс хэллээ. Өмнө нь, 52 жилийн тэртээ, 1969 онд Лэйстэр Сити баг Английн цомын аваргын финалд шалгарсан ч, хожигдож, цомгүй үлдэж байжээ.
2015-2016 оны улиралд Премьер Лигт түрүүлж байсан " үнэгнүүд" тойргийн сүүлийн 2 тоглолтонд оноо алдахгүй байж чадвал топ 4-д шалгарч, ирэх улиралд Аваргуудын Лигт зодоглоно. Тэдний хувьд 3 хоногийн дараа Челси багтай дахин золгоно.
Э.ЛХАГВА