Токио-2020 зуны олимпийн оноо олгох сүүлийн тэмцээн буюу насанд хүрэгчдийн ДАШТ-2021 Унгар улсын нийслэл Будапешт хотноо зохиогдож байна. Энэ удаагийн ДАШТ-д 118 орны 665 жүдочид /эрэгтэй 387, эмэгтэй 278/ өрсөлдөх юм.
ДАШТ эрэгтэй -60 кг, эмэгтэй -48 кг-ын жингийн барилдаанаар эхэллээ. Эрэгтэйчүүдийн -60 кг-ийн жинд залуучуудын ДАШТ-ий хүрэл медальт, “Женко” клуб, “Нью Ариг Ус” компанийн тамирчин Лхагважамцын Өнөболд 3 давсан ч дөрвийн даваанд бүдэрч, үзэгчийн суудалд шилжлээ.
Харин -48 кг-ын жинд Монгол Улсын гавьяат тамирчин ЦЕГ-ын “Хүч” спорт хороо, “Хайбрид Хаус” компанийн тамирчин , Мөнхбатын Уранцэцэг эхний тойрогт гоц мөргөсөн. Хоёр, гурвын даваанд БНСУ-ын Ён-Жү, ДАШТ-ий хошой хүрэл медальт Казахстаны нэрийн өмнөөс барилдаж буй Галбадрахын Отгонцэцэгийг ялсан ч, дөрөвдүгээр тойрогт Японы Косад ялагдан аваргын өрсөлдөөнөөс хасагдлаа. Тэрбээр дагах барилдаанд давж, маргааш медалийн төлөө барилдах болсон.
Дэлхийн аварга шалгаруулах тэмцээний иж бүрэн медальт Уранцэцэг гавьяат тамирчин 2010 онд Унгарт зохиогдсон Дэлхийн АШТ-ээс анхны медалиа авч байсан түүхтэй. Тэрбээр энэхүү уламжлалаа үргэлжлүүлж, дэлхийн чансааг тэргүүлэгч Косово улсын тамирчин Дистриа Красникиг нэмэлт цагт шүүгчдийн үнэлгээгээр ялж, дөрвөн дэлхийн АШТ-ээс медаль хүртсэн ховорхон рекордын эзэн боллоо.
Э.ЛХАГВА
