Уэльсийн баг Туркийг 2:0-ээр хожсоноор 4 оноотой болж, Италийн ард бичигдлээ. Тэд өмнөх тоглолтондоо Швейцарийн багтай тэнцсэн. Хэсгийн сүүлийн тоглолтонд Уэльсийн хувьд Италийн багтай тэнцэх, үгүй ядахдаа 1:0-ээр ч хожигдоход хэсгээсээ шалгарах боломж бүрдэнэ.
-Тоглолтын хувь заяаг аль эрт шийдэх байсан юм. 11 метрийн торгуулийн цохилтыг алдсанаас болж тоглолт эргэх шахсан. Хожих гэж дэндүү яарснаас хаалганы дээгүүр цохисон. Сэтгэлээ барьж чадаагүй. Гэхдээ бид ялалт байгууллаа. Сайн тоглолоо. Энэ хүрээд бидний хожил зогсохгүй. Италичуудтай бид хэсгээ хэн тэргүүлэхийн төлөө өрсөлдөх болно гэж Уэльсийн багийн ахлагч Гарет Бэйл хэллээ. Уэльсийн баг 20-ний өдөр Италитай хэсгийн сүүлчийн тоглолтыг хийх хуваарьтай.
