Тоглолтоос тоглолтонд Польшийн баг ахиж байна. Испанитай хийсэн тоглолтонд хамгаалалт, довтолгоонд хэд хэдэн алдаа гаргалаа. Гэхдээ Словактай тоглосонтой харьцуулбал багийн тоглолт зүгширсэн.
Словакад хожигдсон эхний тоглолтонд дүгнэлт хийж, Испанитай тоглохдоо тактикаа өөрчилсөн нь хэрэг боллоо. Өмнө нь, довтолгоондоо илүү анхаарч, хамгаалалтаа орхисон байсан. Тэгвэл энэ удаад хамгаалалтандаа илүү ач холбогдол өгсөн нь үр дүнгээ өглөө.
Испанитай 1:1-ээр тэнцлээ. Хэсгээсээ шалгарах боломжоо хадгалж чадсан нь хамгийн чухал. Одоо бидэнд хэсгээс шалгарах эсэхээ шийдвэрлэх сүүлчийн тоглолт үлдлээ. Хэсгийг тэргүүлж буй Шведүүд биднийг хүлээж буй. Тэд бидэнтэй адил Испанитай тэнцсэн ч, Словакуудыг хожсон давуу талтай.
Шведээс илүүрхэх зүйл бидэнд байхгүй ч, хөлбөмбөгийн бурхан тэнгэр бидний талд зогсож буй. Испанийн довтлогч Морено 11 метрийн торгуулийн цохилтыг оруулсан бол бид Шведтэй тоглох тухайгаа мартах байсан. Тиймээс Польшийн багт алдах зүйл байхгүй.
Ялахын төлөө бүх хүчээ шавхах болно. Маш хүнд тоглолт болно гэж төсөөлж байна. Польшийн багийн тоглолт дөнгөж орж эхэлж байна гэж Польшийн багийн довтлогч, Испанийн хаалганд тэмцээний гоолыг мөргөж оруулсан Р.Левандовский Sky спортод ярилцлага өгөв.
Э.ОТГОНЖАРГАЛ
