ИСПАНИЙН БАГ ХАМГИЙН ОЛОН ГООЛЫН РЕКОРД ТОГТООВ

Европын Хөлбөмбөгийн Аварга Шалгаруулах Тэмцээнд цөөн тооны, ижил түвшний шилдэг багууд оролцдог. Тиймээс бие биенээ олон гоолын зөрүүгээр хожих нь тун ховор. Нэг л удаа 4:0 -ээр хожигдсон тохиолдол бүртгэгдсэн байдаг. Тэгвэл Испанийн баг хэсгийн сүүлийн тоглолтондоо 5:0-ээр Словакийг бут ниргэснээр гоолын рекордыг шинэчлэн тогтоолоо.

-Хожигдох, тэнцэх аль ч тохиолдолд хасагдах. Хожсон нөхцөлд тэмцээнээ үргэлжлүүлэх цорын ганц сонголттой учирсан. Баг маань гоол оруулж нэг л дөнгөхгүй байлаа. Гоолын мухардал, бөглөрөлд орсон юм шиг санагдаж байв. Багийн төвийн довтлогч Мората 11 метрийн торгуулийн цохилтоо ч Словакийн хаалгачид бариулсан. Тэнцвэл Словак шалгарах гээд байдаг. Яг энэ эгзэгтэй үед, Словакийн хаалгач шонгоос ойсон бөмбөгийг гадагш нь хатгах гээд өөрийн хаалгандаа оруулсан. Нар гийх шиг болсон.

Гоолын бөглөрөл ч арилж, тэр гоолын араас маш хөнгөн 4 гоолыг бид цувуулсан. Рекорд тогтоох нь бидний хувьд чухал биш байлаа. Хамгийн гол нь шигшээ 16-д шалгарч, тэмцээнээ үргэлжлүүлэх болсондоо сэтгэл хангалуун байна. Бидний дараагийн учраа бол 2018 оны ДАШТ-ий финалист Хорватын баг. Бөглөрөл гарч, тоглолт хэвэндээ орсон учир шилдэг наймд үлдэхийн төлөө бүх хүчээ дайчлана. Хэсэгтээ эхний 2 тоглолтондоо тэнцсэн баг Европын АШТ-д түрүүлдэг уламжлалыг бид үргэлжлүүлэхийн төлөө зүтгэнэ гэж Европа Лигт түрүүлсэн Вилльярил багийн довтлогч Жирард Морена Испанийн Спортын сэтгүүлд ярилцлага өгөхдөө онцоллоо.