Дэлхий, Европын аварга Франц (5 оноо) , дэлхийн 4 удаа, Европын 3 удаагийн аварга Герман( 4 оноо), Евро-2016-ийн шинэхэн аварга Португалийн баг (4 оноо) шигшээ 16 -д шалгарцгаалаа. "Үхлийн" хэсэгт мөргөлдсөн аваргууд бүгд "амьд" гарцгааж, дэлхийн хоёр удаагийн мөнгөн медальт Унгарын баг (3 оноотой) л тэмцээнийг орхилоо. Хэсгээ тэргүүлсэн Франц- Швейцарьтай, удаалсан Герман - Англитай, харин шилдэг үзүүлэлтээр 3 дугаар байруудыг тэргүүлж 16-д шалгарсан Португали-Бельгитэй учраа таарлаа.
-Бид хэсгээ тэргүүлснээр замаа засаж чадлаа. Швейцарь бол Англи биш , тэр тусмаа Бельги гэж Францын дасгалжуулагч Дешамп олзуурхлаа. Харин дэлхийн аварга, Германы шигшээ багийн дасгалжуулагчаар ажиллаж байсан Клинсманн: -Герман- Английн тоглолтоос гал гарна. Тоглогчдын ур чадварын түвшин ижил тул үзүүштэй тоглолт болно. Германы баг хэсэгтээ хоёр өөр тоглолт үзүүлсэн. Португалийг хөнгөхөн "арчсан" бол Унгартай хэцүүхэн тоглолоо. Англи ч ялгаагүй. Хорваттай сайн, Шотландтай тааруухан тоглосон. Тэр өдөр энэ хоёр багийн аль илүү формтой нь хожих байх. Ямар ч гэсэн үзүүштэй сонирхолтой тоглолт болно гэж итгэж байна гэж тэрбээр BBC-спортод ярилцлага өглөө.
Э.ЛХАГВА
