Тоглолтын цорын ганц гоолыг Бельгийн довтлогч Торган Азар нэгдүгээр үед оруулснаар багтаа ялалт авчирлаа. Түүний 16 метрийн торгуулийн цохилтын талбайн гаднаас хүчтэй цохисон бөмбөгийг Португалийн хаалгач хааж чадсангүй.
Бельгиуд манай хаалганд цорын ганц удаа л цохисон. Тэр нь хожлын гоол болж хувирсан. Бид харин тоглолтын туршид довтолсон. Гоолын 100 хувийн хоёр ч боломжийг бий болгосон. Нэгийг нь Кортуа хааж, нөгөө нь шон оноод гарсан. Энэ удаад биднийг аз орхилоо гэж Португалийн дасгалжуулагч Сантос тоглолтыг дүгнэлээ.
Манай хоёр багийн тоглогчдын ур чадвар ойролцоо. Гагцхүү бид буруу тактикыг сонгосноор алдлаа. Довтолгоондоо дэндүү найдсан. Адилхан л хамгаалалтандаа илүү анхаарах байж гэж Португалийн хамгаалалтын ноён нуруу болсон Пепе дасгалжуулагч Сантосын тактикийг буруутгаж амжив.
Багийн playmaker Кевин Де Бруйнийг 48, гол довтлогч Эден Азарыг 87 дахь минутанд бэртлийн улмаас сэлгээнд суулгалаа. Гэмтэл бэртэл нь хүнд биш байгаасай гэж найдаж байна. Учир нь Италитай хийх тоглолтонд тэд багаа удирдах гол тоглогчид. Манай багийн хувьд Португалитай тун нягт нямбай тоглолт үзүүллээ. Талбайг бүхэлд нь хянах зорилгоо амжилттай биелүүллээ. Шигүү хамгаалалтыг босгож чадна гэдгээ харууллаа.
Ийм хамгаалалтыг сэтлэхэд хэцүү гэдгийг "Евро-2016" -ийн аварга баг Португальчуудад мэдрүүллээ гэж Бельгийн дасгалжуулагч Мартинес тоглолтын онцлогоос дурдлаа. Португалийг 0:1-ээр буулган авч, шигшээ наймд шалгарсан Бельгийн баг 7 дугаар сарын 02-нд Италийн багтай тулна.
Энэ тухайд:
-Бельгийн багийн "Евро-2021" аялал өндөрлөх яагаа ч үгүй. Биднийг урт зам тосож байна гэж Бруйн хэлэв. Энэ үг нь, Италийн хожигдолгүй цувралыг таслан зогсооно. Бельги финалдана гэж хэлэхтэй адил сонсогдов гэж ВВС Спорт суваг онцлов.
Ц.БАТ-ЭНХ
