Евро-д түрүүлж үзээгүй ч, түүнийг нэг ч удаа өнжөөгүй, хэсгээсээ тогтмол шалгардаг баг бол Чех гэж тайлбарлагч Нанжид хэллээ. Тэд энэ удаад ч хэсгээсээ шалгарч, бүр Голландыг 2:0-ээр (Томаш Холеш , Патрик Шик нар гоолдов) буулган авч, шигшээ наймд дэвшлээ. Чехийн дараагийн өрсөлдөгч нь Англи- Голландын тоглолтоос тодорно.
2018 оны ДАШТ-ийг өнжсөн Голландын багийн хувьд Евро-2021 АШТ-д амжилттай оролцох нь маш чухал байлаа.
Энэ тухайд: -Бид "Евро-2021" АШТ -д финалдах зорилготой ирсэн. Хэсэгтээ Украйн, Австри зэрэг "зөөлөн боорцогтой" таарсан. Энэ нь хэсгээс төвөггүй шалгарахад сайнаар нөлөөлсөн ч, нөгөө талаар биднийг дэндүү тайвшруулжээ. Чех бол Украйн, Австрийн л түвшиний баг. Энэ л сэтгэлгээгээр тоглолтонд хандсан нь бидний гол алдаа боллоо. Гоол алдсаны дараагаас бидний тоглолт эвдэрсэн. Хариу олигтой ч тактик боловсруулж чадсангүй. Уул нь, бид ихийг санаж ирсэн.
Евро-2021-д өндөр амжилт үзүүлэх нь бид бүхний хүсэл мөрөөдөл байсан. Бардсан гэж хэлж чадахгүй ч, өрсөлдөгчөө дутуу үнэлснээс болж Евро-2021 АШТ-ийг хугацаанаасаа өмнө орхилоо. Бид 10 -лаа талбайд үлдлээ (55 дахь минутанд хамгаалагч Маттеус Де Лэйт улаан хуудас авч талбайгаас хөөгдсөн) гээд цуцаж ядраагүй. Бид талбай дээр зохицох, тоглолтоо өөрчлөх чадвараа гээсэн. Бүр өөрийн үндсэн тоглолтоо ч гаргаж чадахаа больсон гэж Голландын хагас хамгаалагч Фрэнк Ионг тоглолтыг дүгнэв.
Э.ОТГОНЖАРГАЛ
