“Токио-2020” зуны XXXII олимпын наадмын төрөл бокс, ширээний теннисний төрлөөр эхэлнэ. Боксын финалын тоглолт 2021 оны 8 дугаар сарын 8-ны өдөр болох хуваарь гарчээ. Ахлах дасгалжуулагч Ж.Энхтөр, гавьяат дасгалжуулагч А.Гантулга нарын удирдлага дор эрэгтэйчүүдийн 57 кг жинд гавьяат тамирчин Э.Цэндбаатар, эрэгтэйчүүдийн 63 кг жинд ОУХМ Б.Чинзориг, эмэгтэйчүүдийн 75 кг жинд ОУХМ М.Мягмаржаргал нар эх орноо төлөөлөн оролцохоор өнөөдөр эх орноосоо мордлоо. Тэдний хамт дасгалжуулагч М.Буянжаргал, О.Батхүү болон бэлтгэл хангагч тамирчид Японы Шизоку мужийн Шимада хотноо 7 дугаар сарын 22-ны өдрийг хүртэл бэлтгэлээ базаах юм байна.
Шизоку муж нь Монголын Чөлөөт бөхийн Холбоотой олон жилийн түншийн холбоотой бөгөөд, анх удаа боксынхныг хүлээн авах болсон нь энэ юм. Монголын боксчдын хувьд олимпын наадмаас 1 алт, 2 мөнгө, 4 хүрэл медаль хүртсэн түүхтэй. Энэ түүхийг хэрхэн яаж үргэлжлүүлэхийг дээрх 3 боксчин мэднэ. Тэдэнтэй хамт нэг онгоцоор 3 х 3 -ийн эмэгтэй сагсчид Япон орныг зорьсон. Анх удаа олимпод оролцох болсон 3 х 3 эмэгтэй багийн түүхэн гавьяа. Олимпод дэлхийн шилдэг 8 баг л оролцоно.