"Токио-1964" зуны олимпийн наадмаар эзэн орны тамирчид 16 алтан медаль авч байсан түүхээ Токио-2020 зуны олимпоор давуулахыг хичээж байна. Хамгийн сүүлийн " Рио-2016 "-аас 41 медаль авсан нь Японы тамирчид олимпоос олимпод амжилттай оролцож буйн тод илрэл юм. Тэр 41 медалийн 12 нь алт байсан. Тэгвэл энэ удаад алтан медалийн тоогоо эрс нэмэгдүүлнэ гэж Японы Үндэсний Олимпийн Хорооны дарга Яшихиро Яшимата NHK-д хэллээ.
Бид 30 алтан медаль авах зорилгыг анхандаа дэвшүүлсэн. Тооцоо судалгааг ч хийсэн байсан. Гэвч цар тахлын улмаас олимп бүтэн нэг жилээр хойшилсноос болж зарим тооцоо алдагдсан. Долоо хоногийн дараа Олимп эхэлнэ. Японы тамирчид 30 алтан медаль авч чадахгүй боллоо ч гэсэн тамирчдад буруу оногдохгүй. Бид хичээх болно. Цэнгэлдэх хүрээлэнд, үзэгчгүй орчинд тэмцээн болох нь тодорхой болсон учир эзэн, зочны ялгаа арилсан гэж тэрбээр нэмж хэллээ.
Япончуудын алтан медалийн тоог нэмэх спортын төрөлд хамгийн түрүүнд жудо, чөлөөт бөх багтаж буй. Ялангуяа эмэгтэй бөхчүүд нь жин бүрт медалийн төлөө өрсөлдөх болно гэдгээ мэдэгдээд буй. Тэдний нэг бол 52, 66 кг-ийн жинд өрсөлдөгчдөө хүлээж буй эгч дүү Абэ Ута нар юм.
Э.ЛХАГВА