Барселона багийн ахлагч, багийнхаа туг нь болж дэрвэж явсан Лионел Месси Францын аварга Парис Сан Жермен багийг зорих болсон нь албажлаа. Тэрбээр төрөлх цэнгэлдэх хүрээлэндээ хэвлэлийн бага хурал хийж, багаа орхих болсноо зарлалаа.
-Би юунаас эхэлж ярихаа ч мэдэхгүй байна. Олон өдөр, олон шөнө энэ тухай бодлоо. Бодоод бодоод ч юу гэж хэлэхээ олсонгүй. Багаа орхих шийдвэр гаргахад тун хэцүү байлаа. Үнэндээ би үүнд бэлэн байж чадаагүй. Жилийн өмнөөс л факс ирж, энэ яриа өрнөсөн. Гэхдээ ийм хурдан, тэр тусмаа энэ ондоо багтан явчих юм гэж огт бодоогүй. Эндээ л үргэлж байх юм шиг бодож байлаа.
Яагаад гэвэл энэ миний ордон, миний гэр бүл. Үүнийг л би хүсэж, хайрлаж , зүтгэж байсан. Барселонад дэндүү аз жаргалтай амьдарсан. Аз жаргалыг би энэ клубт, энэ хотод л олсон. Үүнээс илүү жаргал гэж байгаагүй. 13 настайдаа анх энд хөл тавьснаа санаж байна. Хаашаа ч хөдлөлгүй яг 21 жил өнгөрчээ.
Гэтэл одоо явах гэж байдаг. Анх ганцаараа энд ирсэн бол одоо эхнэр, гурван хүүхдийн хамт явах бэлтгэлээ базааж байна. Би дахиж ирэхгүй хэлж үнэндээ чадахгүй. Учир нь Барселона бол миний гэр орон юм гэж хэлэхдээ, өдгөө 34 настай, Барселона багийн төлөө 778 тоглолт хийж, 672 гоол оруулсан домогт довтлогч Лионел Мессигийн хоолой зангирч, нүднээсээ асгарах нулимсаа арчиж хүчрэхгүй байлаа.
Ц.ЭНХБАТ
