-Месси бол Барселона. Түүнгүйгээр Барса амжилт үзүүлж чадахгүй гэж түүний фанатууд үзэж, клубийн удирдлагыг буруутгах хандлага үргэлжилсээр байгаа тул "Мессиг яагаад явуулсан бэ?" гэдэгт тайлбар өгье. Ла Лигийн Санхүүгийн шударга тоглолт журмын дагуу Испанийн клубууд орлогоосоо давсан төлбөрийг тоглогчдод хийх учиргүй.
Бид Мессид хүссэн цалинг нь олгохын тулд энэ журмыг зөрчих шаардлагатай болсон. Учир нь клубын нийт орлогоос 10 хувь давсан цалинг зөвхөн түүнд олгохдоо тулсан. Нүдээ аниад Мессиг авч үлдэхэд клуб өөрөө " живэх" аюулаас зайлахгүй байлаа. Аргаа барахдаа хоёр жилийн төлбөрөөр таван жил тоглуулах зохицлыг ч Мессид санал болгосон ч бүтээгүй. Бид түүнийг авч үлдэхийн тулд хүчин чармайлт гаргасан. Бүх зүйл коронавирус, түүнээс улбаалсан үзэгчгүй цэнгэлдэх хүрээлэн, орлого тасарснаас үүдэлтэй.
Клубын өмнөх ерөнхийлөгч Жосеп Мариа Бартомеугаас санхүүгийн хувьд дэндүү хүндэрсэн Барселона клубыг хүлээн авсан. Муу биш, маш муу шүү. Нэг тамирчныг авч үлдэх үү, клубээ бүрэн дампууруулах уу? гэдэг сонголтын өмнө бид очсон.
Миний хувьд Барселона багаас дээгүүр үнэлэгдэх нэг ч тоглогч байж болохгүй гэдэг зарчмыг хатуу баримталдаг. Дэлхийн хамгийн шилдэг тоглогчийг ч багийнхаа эрх ашгаас дээр тавьж чадахгүй. Тиймээс Мессиг явуулсан. Үгүй бол, Барселона баг нэгдүгээрт журам зөрчих, хоёрдугаарт дампуурлын ирмэгт өөрийгөө аваачих байсан. Клубын ерөнхийлөгчийн хувьд би ийм шийдвэр гаргаж чадахгүй. Клуб Мессигүйгээр ч оршин тогтноно гэж Барселона клубын өнөөгийн ерөнхийлөгч Лапорте багийнхаа фанатуудад хандаж хэллээ.
Э.ЛХАГВА