Хаити улсын баруун өмнөд хэсэгт болсон хүчтэй газар хөдлөлтийн улмаас амиа алдсан хүний тоо 2189-д хүрлээ гэж тус улсын Иргэний хамгаалалтын газраас мэдээлэв.
Өнгөрсөн бямба гарагт болсон 7.2 магнитудын хүчтэй газар хөдлөлтийн улмаас 12 мянга гаруй хүн бэртэж гэмтээд байгаагаас гадна аврах ажиллагаа үргэлжилсээр байгааг тус байгууллага “Twitter” хуудсаараа дамжуулан мэдээлжээ.
Байгалийн гамшигт үзэгдлийн улмаас амиа алдсан хүмүүсийн тоог бүс нутгаар нь авч үзэхэд өмнөд хэсэгт дийлэнх нь буюу 1832 хүн нас барсан байсан гэдгийг уг мэдэгдэлд дурджээ.
Хаитид болсон хамгийн хүчтэй газар хөдлөлтүүдийн нэгд тооцогдож буй энэ үзэгдлийн улмаас олон хүн амь насаа алдаж, бэртэж гэмтээд байгаагийн зэрэгцээ байшин барилга нурж, эмнэлгүүдийн үйл ажиллагаа доголдоход хүрээд байна.
НҮБ-ын Ерөнхий нарийн бичгийн дарга Антонио Гутерриш Хаитид хүчтэй газар хөдлөлт болсонтой холбогдуулан тус улсад НҮБ-ын зүгээс тусламж үзүүлнэ гэдгийг мягмар гарагт илэрхийлсэн юм.
"Хаити улсын ард түмэнд хандаж хэлэхэд, бид та бүхний хажууд байж, хямралыг даван туулах алхам бүрт дэмжлэг үзүүлэх болно” гэж А.Гутерриш мэдэгджээ.
