Катарын Доха хотод есдүгээр сарын 28-наас аравдугаар сарын 05-ны өдрүүдэд зохиогдох Ази тивийн АШТ-д тэмцээнд оролцохоор улсын хошой аварга Билэгт, дэд мастер Сэр-Од, Мөнхзориг (эрэгтэй), эмэгтэйгээс улсын аварга Болор-Эрдэнэ, спортын мастер Ундрам, Должинлуу нар оролцоно. Багийн ахлагчаар улсын хошой аварга Б.Баярмагнай, дасгалжуулагчаар Солонгос улсын иргэн Кан Дон Хун, шүүгчээр Мөнхбилэг, Буянбат нар явахаар бэлтгэлээ хангаж байна.
Ази тивийн аваргад оролцох тамирчдаа сорилтоор шалгаруулж, эхний 3-д шалгарсан тамирчдыг сонгосон. Эрэгтэйгээс улсын 4 удаагийн аварга Э.Лхагвасүрэн, Я.Бэгз нар хүндэтгэх шалтгааны улмаас уг сорилтод оролцоогүй. Б.Баярмагнай эхний гуравт шалгарсан боловч, багийн ахлагчаар томилогдсон тул дөрөвт орсон Мөнхзоригийг дэвшүүлсэн. Баг, нэгбүрчилсэн, холимог, дан хосын бүх төрлөөр манай тамирчид оролцоно. Бидний зорилго бол тэмцээнд амжилттай оролцож, рэйтингээ өсгөх гэж МШТХ-ны ерөнхийлөгч Ц.Гантулга Control.mn сайтад хэллээ.
Э.ОТГОНЖАРГАЛ
