Ширээний теннисний Азийн аварга шалгаруулах 25 удаагийн тэмцээн Катар улсын Доха хотод үргэлжилж байна. Улсын хошой аварга Б.Билэгт, дэд мастер Мөнхзориг, Сэр-Од нар хэсгийн тоглолтонд Саудын Араб, Катар, Арабын Эмиратын багт тус бүр 3:0-ээр хожигдлоо. Байр эзлүүлэх тоглолтонд Малдив, Киргизийг 3:0-ээр дараалан хожсоноор 28 багаас 25 дугаар байр эзэллээ. Харин улсын аварга Болор-Эрдэнэ, спортын мастер Ундрам, Должинзуу нар Катарыг 3:0-ээр хожиж, Узбекистанд 3:1-ээр хожигдож хэсгээсээ хоёроор шалгарч, Индонезийг 3:0-ээр хожиж 18 багаас 13-р байранд дэвшлээ. 2019 онд, Индонезийн Жакартад болсон ААШТ-тэй харьцуулбал монголын эрчүүд 2 байраар ухарч, эмэгтэйчүүд 2 байраар урагшиллаа гэж Монголын багийн ахлагч Б.Баярмагнай Доха-гаас мэдээллээ.