Түрүүлсэн боксчинд 100 мянган ам.долларыг олгох өндөр бооцоот шагнал бүхий сонирхогчдын боксын ДАШТ Сербийн нийслэлд үргэлжилж буй. 67 кг-ын жинд өрсөлдөж буй Б.Чинзориг эхний тойрогт Гватемалын Карлос Тобарыг 4:1, хоёр дахь тойрогт Италийн Винченцо Манджакапрег 5:0 -ээр илүүрхэн тус тус яллаа. Хоёр дахь тойрогт Чинзоригт ялагдсан Италийн Винченцо бол Лондоны олимпын хүрэл, ДАШТ-ий хүрэл медальт (2011), Европын наадмын мөнгөн медальт( 2015), Европын АШТ-ий хүрэл медальт тун туршлагатай тамирчин байсан. Гуравдугаар тойрогт Мексикийн Марко Эрнандестай таарсан. Маркогийн хувьд энэ ДАШТ-д одтой тоглож буй тоглогчийн нэг. Тэрбээр эхний хоёр тойрогт нэг ч оноо алдалгүйгээр Унгар, Кенийн тамирчдыг 5:0 -ээр илт давамгайлан ялсан. Түүнийг ялсан тохиолдолд Чинзориг Дэлхийн аваргын хошой хүрэл медальт, Казахстаны Аблайхан Жусуповтой учирна. Юсупов бол 67 кг -ын жингийн энэ хэсгийн хамгийн хүчтэй өрсөлдөгч юм Сербиэс мэдээллээ.
Э.ОТГОО
