Кюүшү башёд түрүүлснээр Японы эзэн хааны зургаа дахь удаагаа өргөсөн Терунофужи ирэх оны 6 башёгийн 4-д түрүүлэх хатуу амлалт авлаа. Тэрбээр 15-0 даван түрүүлснээр Сумо бөхийн түүхэнд аварга цолонд хүрснээс хойш дараалан хоёр удаа эзэн хааны цомыг өргөсөн тав дахь их аварга боллоо. Хамгийн сүүлд, 60 жилийн өмнө Тайхо аварга энэ амжилтыг давтаж байсан аж. - Өмнө нь түрүүлж байсан. Анх удаа л нэг ч уналгүй түрүүллээ. Башё эхлэхээс өмнө нэг ч унахгүй барилдана гэсэн зорилгыг өөртөө тавьсан.Түүндээ хүрлээ. Ирэх онд башё алгасахгүй түрүүлэх зорилго тавьж байна. Дор хаяж 4 түрүүг авч, цомынхоо тоог дан биш, давхар оронтой тоонд дэвшүүлнэ гэж Терунофужи аварга NHK телевизэд ярилцлага өглөө. Өнөөдөр 30 насыг зооглож буй Терунофужи 2021 онд аварга цолонд хүрсэн амжилт гаргаснаас гадна, Монгол улсын иргэншлээс татгалзаж , Япон улсын иргэншилтэй болсныг Киодо агентлаг онцоллоо. Э.ЛХАГВА
