Таван удаа финалдахдаа тавууланд нь ялалт байгууллаа. Анх Портотой ( 2002-03) Европын цомын аварга, дараа нь Портогийн хамт ( 2003-04) Аваргуудын Лигийн цом, Интер Милан багтай ( 2009-10) мөн л Аваргуудын Лигийн цом, Манчестер Юнайтед багтай ( 2016-17) Европа Лигт түрүүлж байсан бол энэ удаад Рома багтай Европын Конференсе Лигт түрүүллээ. Тэгснээрээ Европын цомын аваргуудын бүх цомыг өргөсөн цорын ганц дасгалжуулагч болов. Түүний удирдсан Рома баг Голландын Фейноорд багийг 1:0-ээр буулган авч, Европын цомын тэмцээний анхны ялалтаа байгууллаа. - Түүхийн хуудсыг шинэчиллээ. Бид Европа Конференсе Лигт түрүүлнэ гэдэгтээ эхнээсээ л итгэлтэй байсан. Түүндээ хүрлээ. Чадлаа. Би хувьдаа аз жаргалыг мэдэрч байна. Романтик сэтгэлгээ миний бодлыг эзэллээ. Гэхдээ л би ид шидэнд итгэдэггүй. Энэ улиралд өмнөхөөс өөр зүйл юу ч болоогүй. Бид тоглогч бүрийнхээ давуу болон сул талыг сайн тооцсон. Хөлбөмбөг бол багийн л тоглолт, нэг хүнээс хамаардаггүй спорт гэдгийг харууллаа гэж Жозе Моурино тоглолтын төгсгөлд хэллээ. Тэрбээр 2017 оноос хойш ийнхүү дахин цом өргөж, цомын тэнгэртэй дасгалжуулагч гэдгээ нотоллоо.
Э.Лхагва
