Үлэмж биетэн, орчин цагийн Гулливер. Ингэж Ичиножиг нэрлэж байв. 2014 онд, одоогоос 9 жилийн өмнө Японы сумогийн дээд зиндаанд түүнийг дэвшин барилдаж, 13 давахад нь ирээдүйн аварга мэндэллээ гэж шуугиж байв. Их аварга Дагвадоржийг түрүүлэхэд нь Японы NHK телевиз Монголд бүхэл бүтэн телевизийн баг илгээж, цуврал нэвтрүүлэг бэлдэж цацаж байсантай ижил, Архангайн Батцэнгэл суманд NHK телевизийн десант бууж байсан. Өөрөөр хэлбэл түүнээс маш ихийг тэртээ 9 жилийн өмнө сумогийн ертөнц хүлээж байсан. Харамсалтай нь, Ичиножи өнөөдрийг хүртэл түрүүлж чадаагүй. Бүр түрүүлнэ гэдэгт нь ч фэнүүд нь итгэл алдарсан байсан гэж хэлж болно. Тэр нуруундаа бэртэл авснаас болж, амжилт нь буурсан. Өмнө нь 12, 13, 14 давж байсан ч, түрүүлж чадаагүй тэрбээр энэ удаад 12 дараатайгаар түрүүлж, эзэн хааны цомыг анх удаа өргөлөө. - Энэ башёд дараалан 6 давсны дараа түрүүлчихэж болох юм байна гэдэг бодол анх гялхийсэн. Сайн барилдаж, цолоо ахиулж, улмаар Озеки цолонд хүрье л гэж зорьсон гэж Ичиножи цом өргөсний дараа хэллээ. 192 см өндөр, 187 кг жинтэй Ичиножи өнгөрсөн жил Япон улсын иргэншилтэй болжээ. Тэрбээр 15 дахь өдрийн барилдаанд ёкузано Терунофужитэй ижил 11 даваатай барилдаж, аварга унаж, өөрөө Уранаг давснаар түрүүллээ. Тэгснээр монгол гаралтай бөхчүүдээс Сумогийн дээд зиндаанд түрүүлсэн найм дахь бөхөөр тодорлоо.
Э. ОТГОНЖАРГАЛ
