Европ тивийн АШТ-нээс алтан медаль авахад Полкановад ердөө л 23 минут шаардагдлаа. Финалд эхний хоёр өргийг 11-9, 11:2 --оор хожиж явсан ч, нутгийн эзэн тоглогч Нина Миттелхам тоглолтыг зогсоосноор Полканова анх удаа Европ тивийн аварга боллоо. Түүний өрсөлдөгч Нинагийн мөрний бэртэл нь сэдэрснээр тоглолтыг үргэлжлүүлэх боломжгүй болсон байна. - Маш гунигтай тохиолдол. Нинагийн өмнөөс харамсаж буйгаа илэрхийлье. Хэлэх ч үг олдохгүй байна. Би бол хэзээ ч, финалын тоглолтонд бууж өгч чадахгүй. Тэгвэл би л лав дуусна. Гэтэл Нина тоглолтыг зогсоож, бууж өгсөн. Хэдийгээр алтан медаль зүүх сайхан ч, ийм маягаар аваргын титмийг зүүх нь амтгүй юм. Финалын тоглолтын төгсгөлд би уйлна гэдгээ мэдэж байсан. Учир нь нэг долоо хоногийн дотор бүх хүчээ шавхсан 15 тоглолт хийлээ. Хүч тамир ч барагдаж, сэтгэл ч хоосорсон. Тиймээс хожигдсон бол Нинагийн ижил мөн л харамсан уйлах байлаа. Гэвч энэ удаа баярын нулимс унагалаа. Сэтгэлээ барьж чадсангүй. Барихын ч аргагүй байлаа гэж Австрийн теннисчин Полканова тэмцээний дараа сэтгэгдлээсээ хуваалцлаа. Тэрбээр финал, хагас финал, шигшээ наймд Германы шигшээ багийн гурван тоглогчийг дараалан хожсоноор ийнхүү аваргаллаа. Хамгийн хүнд тоглолт нь хагас шигшээд Винтерийг 4:3-аар хожсон юм.
Ц.ЭНХБАТ