Улаанбаатар /МОНЦАМЭ/. Дэлхийн бөхийн нэгдсэн холбооноос зохион байгуулж байгаа “Белград 2023” энэ сарын 24-ийг хүртэл үргэлжилнэ.
Эхлээд чөлөөтийн эрчүүд 16-19-нд дэвжээнд өрсөлдөж, дараа нь эмэгтэй чөлөөт 18-21, сүүлд нь сонгомол барилдааныхан есдүгээр сарын 21-24-нд дэлхийн аваргын медаль, олимпын эрхийн төлөө өрсөлдөх юм. Энд олимпын 90 эрх олгоно. Гурван төрөлд олимпын 18 жин тус бүрт таван эрх олгох болно. Тэгэхээр хүрэл медалийн төлөө ялагдсан бөхчүүд олимпын эрхийн төлөө барилдана гэсэн үг юм.
Сербийн нийслэл Белград хотод Парисын олимпын эрх олгох чөлөөт бөхийн ДАШТ явагдаж байна. Одоогийн байдлаар 17 орны тамирчид олимпын эрхээ авчээ.
Тодруулбал, АНУ, ОХУ тус бүр 3, Иран, Серби, Япон тус бүр 2, Гүрж, Турк, Сан-Марино, Казахстан, Узбекистан, Албани, Армени, Унгар, Пуэрто-Рико, Азербайжан, Бахрейн, Грек улсууд тус бүр нэг олимпын эрхтэй болоод байна. Үүн дотроос АНУ, ОХУ-ын тамирчид одоогоор хамгийн олон эрхийг аваад байгаа бөгөөд нийт 24 бөх олимпод хүч үзэх эрхээ авчээ.
