Монголын Ширээний Теннисний Холбооны цомын аварга шалгаруулах тэмцээнд 16 настай Манлайжаргал түрүүлж, 13 настай Мөнх-Өлзий удааллаа. Хүрэл медалийг улсын 4 удаагийн аварга өдгөө 45 настай Я.Бэгз, 2 удаагийн аварга, дөч шүргэж буй Б.Баярмагнай нар хүртэв. Харин шигшээ багийн, ид насандаа гялалзаж буй тамирчид сураг алдарлаа. Мөнх-Өлзий хагас шигшээ наймд 3:2-оор Улсын шигшээ багийн тамирчин Тэмүүлэнг, харин Манлайжаргал 2023 оны улсын аварга, мөн шигшээ багийн тамирчин Сэр-Одыг 3:0-ээр хожиж хагас шигшээд шалгарсан. Тэд хагас шигшээд (Мөнх-Өлзий 3:0 Баярмагнай, Манлайжаргал 3:2 Бэгз) туршлагатай ахмад мастеруудыг хожиж аваргын төлөө өөр хоорондоо өрсөлдсөнөөс Манлайжаргал 3:0-ээр Мөнх-Өлзийг илүүрхэн түрүүлэв.
Манлайжаргалын хувьд 2023 оны УАШТ-ээс анх удаа хүрэл медаль хүртсэн бол түүнийгээ цомын аварга цолоор чимлээ. Мөнх-Өлзийгийн хувьд ирээдүйтэй тамирчин гэдгээ нэгэнт харуулж эхэлсэн. Тэрбээр энэ намар Дархан хотод зохиогдсон мастеруудын тэмцээнд улсын аварга Б.Билэгт, шигшээ багийн тоглогч Ж.Мөнхзориг нарыг хожиж, финалын тоглолтонд Билэгжаргалд өгөө аваатай хожигдож мөнгөн медаль авсан.
Ийнхүү амжилт нь тогтвортой өсөж буй Мөнх-Өлзийг ойрын жилүүдэд аварга болох магадлалтай тамирчны тоонд хэдийнээ нэрлэх болсон. Аваргуудаас Монгол улсын 4 удаагийн аварга Лхагвасүрэн гадаадад ажлаар явсан учир оролцож чадаагүй байна. Харин эмэгтэйчүүдэд 2023 оны улсын аварга Ундрам түрүүлж, УАШТ-ийн финалд түүнд хожигдсон Б.Должинзуу мөн л мөнгөн медаль дээр " уналаа". Олон Улсын Ширээний Теннисний Холбоо томоохон тоглолт бүрийн дараа тамирчдын рейтингийг тогтоон заралдаг. Хэрвээ манайх рейтингээ тогтоож хэвшвэл 13 настай Мөнх-Өлзий, 16 настай Манлайжаргал нар дээгүүр бичигдэх юм.
Ц.ЭНХБАТ
