Шулуун гэдэсний амсрын цооролтыг мэс заслын аргаар эмчлэх шинэ аргачлалыг АШУҮИС-ийн ИСНЭ-т нэвтрүүлж байна. ДЭМБ-ын хамтын ажиллагааны төвийн урилгаар Солонгос улсын Жонжү хотын Ханду эмнэлгийн эмч Ий Чол Ху Монголд ирж АШУҮИС-ийн резидент эмч болон оюутнуудад 2 хоногийн сургалт хийсний дээр дөрвөн хүнд мэс засал хийсэн байна. Шинээр нэвтрүүлсэн мэс заслын эмчилгээ нь өмнө нь хийгддэг байсан мэс заслын ажилбарыг бодвол эдгэрэлт нь хурдан байхаас гадна эмчилгээний үр дүн сайтай гэдгийг эмч нар онцолж байлаа.
Шулуун гэдэсний амсрын цооролт буюу парапроктит гэдэг нь шулуун гэдсийг бүрхэж байдаг эдийн идээт үрэвсэл юм. Шулуун гэдэсний амсар орчмын хурц үрэвслийн шалтгаан нь хувийн ариун цэврийг сахихгүй байх, шулуун гэдэсний суваг орчмын гэмтэл авах, шулуун гэдэсний амсар орчмын өвчин (хошногын амсар цуурах, шамбарам) зэрэг юм.
Парапроктитийг цаг тухайд нь эмчилгээ хийлгүй орхивол шулуун гэдэсний хана идээнд идэгдэн гэмтэх, эрэгтэй хүнд шээсний сүвний хана гэмтэх, эмэгтэй хүнд идээ үтрээ рүү цоолж гоожих зэрэг хүндрэл үүсч болзошгүй юм. Хамгийн аюултай хүндрэл бол идээ бага аарцаг руу цоорч гоожих бөгөөд оношийг оройтуулж тавьбал үхэлд ч хүргэж аюултай.
Л.ГАНТУЯА