"Memoriad-2016" оюуны олимпийн эхний төрөл болох "Хурдны хөзөр"-ийн дүн гарсан байна. Уг тэмцээнд хоёр оролдлогын хамгийн сайн хийсэн үзүүлэлтээр байр эзлүүлдэг бөгөөд ОУ-ын Мастер Т.Энхжин нэг багц буюу 52 ширхэг хөзрийг 27 секундэд дарааллаар нь тогтоон алдаагүй нэрлэж, хүрэл медалийн болзлыг хангасан байна.
Ингэснээр тэрээр монголын тамирчдын анхны медалийг авчирлаа. Мөн хоёр дахь төрөл болох цээж бодолтын "Mental Multiplication" буюу найман оронтой хоёр тооны үржвэрийг олох тэмцээнд Д.Биндэръяа нийт 10 бодлогыг 7 минутад бүгдийг нь алдаагүй цээжээр бодсоноор оюуны олимпийн мөнгөн медаль хүртлээ.
Мөн энэ төрөлд бага насны тамирчид оролцсон бөгөөд Б.Хангал 9 бодлого алдаагүй бодсоноор 5 дугаар байрт, Б.Энхлүүн 8-р байрт оржээ. Тус тэмцээнд 27 орны 167 тамирчин насны ангилал харгалзалгүй ой тогтоолт, цээж бодолт болон хурдан уншлагын нийт 13 төрлөөр өрсөлдөж шилдгүүдээ тодруулна.
А.ГАНТУЯА