Наадмаас хойшхи барилдаануудыг үзэхэд ийм сэтгэгдэл төрөх болов. Аварга Санжаадамбыг торгоох бөх байхгүй болжээ, үндсэндээ. Түүнтэй нэг ижил цолтой Эрхэмбаяр, Мөнхбат аварга нарт ч түүнд эсэргүүцэл үзүүлж чадахаа больжээ. Санжаадамба бүгдээрэнгээр нь "тоглож" харагдана. Хамгийн сүүлийн барилдаан гэхэд л, түүний өмнөөс тулаад зогсчих олигтой хүчтэн үзэгдсэнгүй. Хантайшир дэвжээний 15 жилийн ойд зориулсан хүчит бөхийн барилдаанд мөн л Санжаадамба тасархай түрүүлэв. Тэр гүйлтийн Усайн Болт шиг бусдаасаа тасарсан гэж зүйрлэж болох нь. Үзүүр түрүүнд түүнтэй учраа таарсан, аймгийн арслан Хангай гэхэд л, арсланд бариулж буй тугал шиг л харагдлаа. Энэ сард, улс тунхагласны баяр, он гараад цагаан сарын барилдаан болно. Түүгээр л, Санжаадамбын өөдөөс эсэргүүцэл үзүүлэх хүчтэн байгаа эсэхийг эцэслэн тандая.
Бөх сонирхогч А. БУЛГАН
