Үндэсний спортын ууган гавьяат мастер, дархан аварга Б.Түвдэндоржийн мэндэлсний 100 жилийн ойд зориулсан бөхийн барилдааныг Булган аймгийн нутгийн зөвлөл зохион байгуулж байгаа бөгөөд олимпийн аварга Н.Түвшинбаяр, улсын гарьд И.Доржсамбуу, улсын заан Д.Баасандорж зэрэг улс аймгийн алдар цолтой бөхчүүд зодоглохоор болжээ.
Энэ жил их аваргын мэндэлсний 100 жилийн ойд зориулж, төрсөн нутагт нь дурсгалын хөшөөг нь сүндэрлүүлж, өсвөрийн бөхчүүдийн барилдаан зохион байгуулах болсноо нутгийн зөвлөл дуулгалаа. Энэ сарын 20-нд Монгол бөхийн өргөөнөө 256 бөхийн барилдаан болох бөгөөд “Эргэл хайрханы домогт хүчтэн” дууг дүрсжүүлэн, аваргын амьдралыг харуулсан түүхэн баримтат кино, ном бүтээхээр болсон байна.
Сонирхуулахад Б.Түвдэндорж 1939 оны Улсын их баяр наадамд анх барилдсан жилээ 512 бөхөөс "урт гарт" гэж алдаршсан алдарт Маамын Лхагва арсланг өвдөг шороодуулан түрүүлж шууд улсын арслан цол хүртсэн түүхтэй. Улсын баяр наадамд долоо түрүүлж, хоёр үзүүрлэсэн домогт аваргын шавь нараас үндэсний бөхийн аварга хоёр, олимп, дэлхийн мөнгө хүрэл медальт 10 гаруй тамирчин төрөн гарсан тухай түүний охин Т.Отгон чулуун дурсан ярьсан байна.
Б.БАТБААТАР