Улсын харцага Б.Бат-Өлзий улсын баяр наадамдаа амжилттай барилдаж улсын шилдэг начин Б.Амарзаяагаар 5, улсын начин Д.Анараар 6 давж Улсын харцага харцага цолны болзол хангасан юм. Мөн наадмын өмнөхөн болсон Сонгинохайрхан уулын хишиг барилдаанд аймгийн хурц арслан Б.Золбоотой үлдэж түрүүлсэн бол есдүгээр сард зохиогдсон Ю.Цэдэнбал даргын нэрэмжит барилдаанд их шөвөгт шалгарсан.
Улсын начин Э.Даш төрийн наадамдаа дөрвийн даваанд улсын начин Б.Дэлгэрсайханд унаж дэмжигчдийнхээ урмыг хугалсан бол 12 дугаар сард зохиогдсон Богдханы хишиг барилдаанд арслан Р.Пүрэвдагва, харцага Ц.Сономдорж нарыг давж түрүүлсэн. Мөн “Монгол бахархал”-ын өдрийн барилдаанд гарьд Б.Гончигдамбыг давж үзүүр түрүүнд үлдээд Р.Пүрэвдагва арсланд өмсүүлж унасан.
Улсын арслан Н.Батсуурь төрийн наадамдаа Б.Пүрэвсайхан заанаар 8 даваад арслан Р.Пүрэвдагвад өвдөг шороодсон. Намрын улирлын нээлтийн барилдаанд улсын начин Ч.Баянмөнхтэй үлдэж түрүүлсэн бол Ю.Цэдэнбал даргын нэрэмжит барилдаан болон Ц.Чимэд-Очир аваргын 100 насны ойн барилдааны их шөвөгт шалгарсан амжилттай байна.
Улсын аварга Ч.Санжаадамба олон дэмжигчдийнхээ хүлээлтийг тайлж төрийн наадамдаа 10 давж түрүүлсэн. Есдүгээр сараас хойш “Хантайшир” дэвжээний 15 жилийн ойн барилдаанд түрүүлж, “Бөхбилигт” дэвжээний 20 жилийн ойн барилдаанд үзүүрлэсэн амжилттай байна.
Улсын гарьд Б.Гончигдамба төрийн наадамдаа Улсын начин Ц.Чимэддоржоор 6 даваад үзүүр бөх арслан Р.Пүрэвдагвад өвдөг шороодсон. Аравдугаар сард зохиогдсон Баянзүрх хайрханы хишиг барилдаанд түрүүлсэн бол “Нийтийн орон сууц аж ахуйн салбар”-ын барилдаанд үзүүрлэсэн. Мөн “Монгол бахархлын өдөр”-ын барилдаанд их шөвөгт шалгарсан амжилттай байна.
.JPG)
Улсын аварга Г.Эрхэмбаяр улсын наадамд харцага Б.Бат-Өлзийгөөр 7, аварга С.Мөнхбатаар 8 давж их шөвөгт үлдээд түрүү бөхөд тахим өгсөн. 2016 оны Сар шинийн барилдаан болон улсын гарьд цолны хүндэтгэлийн барилдаанд үзүүрлэсэн байна.
.JPG)
Улсын харцага Ц.Содномдорж төрийн наадамдаа Улсын начин Л.Батзоригоор 6 даваад зааны төлөөх хариуцлагатай барилдаанд Улсын заан Б.Пүрэвсайханыг дийлээгүй. Содномдорж харцага Сар шинийн барилдаан, Сонгинохайрханы хишиг, Заан цолны хүндэтгэлийн барилдаануудад түрүүлсэн бол Богдханы хишиг барилдаанд үзүүрлэсэн амжилттайгаар 2017 онтой золгож байна.
Улсын харцага Т.Баасанхүү төрийн наадамдаа Улсын начин Д.Амарсайханаар 6 давж харцага цолны болзол хангаад аварга Ч.Санжаадамбад тахим өгсөн. Баасанхүү харцага наадмын сорилго, Ардчиллын ойн барилдаануудад түрүүлж, Баянзүрх хайрханы хишиг, Заан цолны хүндэтгэлийн барилдаануудад их шөвөгт шалгарсан байна.
.JPG)
Улсын заан Б.Пүрэвсайхан төрийн наадамдаа харцага Ц.Содномдоржтой тунаж барилдаж даваад заан цолны цолны болзол хангаад арслан Н.Батсуурьт унасан. Баянзүрх хайрханы хишиг болон Б.Түвдэндорж аваргын мэндэлсний 100 жилийн ойн барилдаанд үзүүрлэсэн бол Ц.Чимид-Очир аваргын мэндэлсний 100 жилийн ойн барилдаанд их шөвөгт шалгарсан амжилттай байна.
Улсын арслан Р.Пүрэвдагва төрийн наадамдаа уриатай барилдаж арслан Н.Батсууриар 9 давж үзүүрлэснээр арслан цолны болзол хангасан юм. Р.Пүрэвдагва арслан намраас хойш “Монгол бахархал”-ын өдөр болон “Бөх билигт” дэвжээний 20 жилийн ойн барилдаануудад түрүүлж, Богдханы хишиг барилдаанд их шөвөгт шалгарсан амжилтаар нийт бөхчүүдийн чансаагаараа тэргүүлж 2017 оныг угтаж байна.
О.ДАШНЯМ
