Та бүхэнд шинээр Улсын начин цолд хүрсэн бөхчүүд ямар амжилттай байгаа талаар мэдээллийг хүргэж байна. Ардын хувьсгалын 95 жилийн ой, үндэсний их баяр наадам өргөн дэлгэр болсон. Наадамд 1024 хүчтэн зодоглосноос нийт 17 аймгийн цолтон тав давж улсын начин цолны болзол хангасан бол Өвөрхангай аймгийн Уянга сумын харьяат аймгийн арслан Х.Гантулга, Ховд аймгийн Зэрэг сумын харьяат аймгийн арслан Б.Бат-Өлзий, Завхан аймгийн нөмрөг сумын харьяат аймгийн заан Д.Бат-Эрдэнэ нар зургаа давж Улсын харцага цолны болзол хангасан юм.
Улсын начин Б.Ганхуяг начин цол хүртсэнээсээ хойш нийт найман барилдаанд барилджээ. Улсын начин цолонд хүндэтгэл үзүүлэх барилдаанд Улсын гарди Б.Гончигдамбаар найм давж түрүүлсэн бол Барилгачдын баярын барилдаанд Улсын харцага Д.Бат-Эрдэнээр 5 давж их шөвөгт шалгарсан байна. Мөн Цэдэнбал даргын мэндэлсний 100 жилийн ойн барилдаанд 4, Ц.Чимэд-Очир аваргын мэндэлсний 100 жилийн ойд 3 давсан юм.
Улсын начин Ч.Хөхчирэнгэр начин цол хүртсэнээсээ нийт 6 барилдаанд зодоглосон байна. Цэдэнбал даргын мэндэлсний 100 жилийн ойн барилдаанд 5 давсан бол Улсын начин цолонд хүндэтгэл үзүүлэх барилдаанд 3, Богд Ханы хишиг барилдаанд 3, Барилгачдын баярын барилдаанд 3 давсан юм.
Улсын начин Д.Амарсайхан энэ намраас хойш 3 барилдаанд зодогложээ. “Бөх Билигт” дэвжээний 20 жилийн ойн барилдаанд Улсын харцага Ц.Содномдоржоор 5 давж шөвгөрсөн бол Үндэсний бахархлын өдөр, Ерөнхийлөгчийн цомын төлөөх барилдаан, болон Ц.Чимэд-Очир аваргын мэндэлсний 100 жилийн ойн барилдаануудад 2 давжээ.
Улсын начин Б.Чимэдвандан 6 барилдаанд зодоглосон байна. “Хантайшир” дэвжээний 15 жилийн барилдаанд 6 давсан бол улсын начин цолны хүндэтгэлийн барилдаанд 3 давсан байна. Мөн Монгол бахархлын өдөр, Бөх билилигт дэвжээний 20 жилийн ой, Баянзүрх хайрханы хишиг барилдаануудад 2 давсан юм.
Улсын начин Л.Шинэбаатар намраас хойш хоёр удаа зодоглосон юм. “Бөх билигт” дэвжээний 20 жилийн ойд 4 давсан бол Ц.Чимэд-Очир аваргын 100 жилийн ойн барилдаанд 2 давсан байна.
Ц.Чимэд-Очир аваргын 100 жилийн ой, Богд Ханы хишиг, Баянзүрх хайрханы хишиг барилдаануудад зодоглож 3 давсан байна.
Улсын начин Д.Анар наадмын дараа Дорнод аймгийнхаа наадамд зодоглож үзүүрлэсэн бол Багануур дүүргийн наадмын 4-ын даваанд Завхан аймгийн арслан Б.Шаравнямбууд өвдөг шороодсон. Бөхийн өргөөнд “Хантайшир дэвжээ” Баянзүрх хайрханы хишиг барилдаанд барилдаж 2-ын даваанд нэг нутгийн аймгийн начин Б.Батдоржид тахим өгсөн байна.
Улсын начин Л.Батзориг Ц.Чимид-Очир аваргын мэндэлсний 100 жилийн ойн барилдаанд 4 давсан бол Хантайшир дэвжээний 15 жилийн ойд аймгийн харцага Д.Ганцоожоор 2 даваад аймгийн арслан Ж.Алтаншагайд өвдөг шороодсон юм. Архангай аймгийн Цэнхэр сумын харьяат Улсын начин Э.Ванданцэрэн “Бөхбилигт” дэвжээний ойд зодоглож Улсын гарьд Ш.Жаргалсайханаар 5 давж шөвгөрсөн бол тус сумын харьяат Улсын начин Ц.Нямдорж нэгийн даваанд Говьсүмбэр аймгийн харьяат сумын заан Э.Мөнхбаатарт өвдөг шороодсон.
Бусад начингуудын хувьд бөхийн өргөөнд зохиогдож буй барилдаануудад хараахан зодоглож амжаагүй байгаа юм.
О.ДАШНЯМ