Монгол улсын гавьяат дасгалжуулагч В.Батбаярын нэрэмжит сонирхогчдын боксын насанд хүрэгчдийн улсын аварга шалгаруулах тэмцээн энэ өдрүүдэд үргэлжилж байна. Тэмцээний алтан медалийн төлөөх тулаанууд өчигдөр “Спортын төв ордон”-ны “А” зааланд явагдлаа.
Эрэгтэйчүүдийн 49 кг-ын жинд “Хилчин” спорт хорооны тамирчин олон улсын хэмжээний мастер Гантулгын Ган-Эрдэнэ “Алдар” спорт хорооны тамирчин Х.Энхмандахыг шигшээ тулаанд ялснаар УАШТ-нд зургаа дах удаагаа түрүүллээ.
Энэ жинд хүрэл медалийг “Эрдэнэт бокс” клубийн Х.Азбаяр, “КО СЭ” клубийн Ц.Жамьянбат нар хүртсэн юм. Эрэгтэйчүүдийн 56кг-нд шинэ аварга төрж Б.Мишээлт алтан медалийн эзэн болсон. Тэрбээр шигшээ тулаанд ОУХМ Х.Энх-Амарыг 5:0 ялж улсын аваргад анх удаа түрүүлсэн.
Х.Энх-Амар 52кг–нд тулалддаг бөгөөд энэ удаагийн УАШТ–нд жин өгсөж тулалдсан юм. Хүрэл медалыг “Барселоно” клубийн Б.Төмөрхуяг, “Ширэн бээлий” клубийн Б.Төгөлдөр нар хүртлээ. 56кг-нд сүүлийн хоёр гурван жил хоорондоо хүчтэй өрсөлдөгчид байсан Э.Цэндбаатар жин өгссөн бол Э.Идэрхүү улсын аваргыг өнжсөн юм.
64кг-ын жинд Армийн Дэлхийн аварга “Алдар” спорт хорооны тамирчин олон улсын хэмжээний мастер Б.Чинзориг “Ширэн бээлий” клубийн тамирчин Г.Баярхүүг ялж түрүүлснэээр УАШТ-нд тав дах удаагаа түрүүлсэн юм.
64кг-ийн хүрэл медалийг Баянхонгор аймгийн тамирчин М.Батбаяр, Улаан Ирвэс коубийн тамирчин Л.Эрдэнэбаяр нар хүртсэн.
Эмэгтэйчүүдийн 60кг-нд “Талын бүргэд” клубийн боксчин У.Шинэцэцэг алтан медаль хүртсэн бол мөнгөн медалийг “Эхлэл” клубийн А.Уянга хүртсэн. Хүрэл медалийг Баянхонгорын Р.Отгонбаяр, “Алтан бээлий” клубийн Г.Золжаргал нар хүртсэн юм.
О.ДАШНЯМ