Энэ сарын 23-нд Швед улсад бөмбөгтэй хоккей буюу бендийн Дэлхийн аварга шалгаруулах тэмцээн эхэлнэ. Тус тэмцээнд оролцохоор Монголын шигшээ баг Швед улсыг өнөөдөр зорилоо.
Манай бендичид ДАШТ-ний “Б” дивизоны “А” хэсэгт тоглох бөгөөд хэсэгтээ Япон, Унгар, Украйн гэсэн улстай сугалаагаар оноолт таарсан юм. “Б” хэсэг Канад, Голланд, Чех, хятад, Эстони, Сомали гэсэн 6 багтай бөгөөд хэсгээс 4 баг нь цааш шалгарах юм. Монголын шигшээ баг нэгдүгээр сарын 24-нд Украйнтай, 25-нд Японтой тоглох хуваарьтай байна.
Монголын баг хэсгээс нэгдүгээр байраар гарвал “Б” хэсгийн 4 өөр гарсан багтай, хоёрдугаар байраар шалгарвал 3-аар гарсан багтай учраа таарах юм. Улмаар энэ тоглолтуудаа амжилттай хийж хожил авбал цаашаа хагас шигшээд өрсөлдөнө. Хэрэв түрүүлж чадвал ирэх жил “А” дивизонд өгс ч тоглох боломжтой болно.
О.ДАШНЯМ
